Астана сыртына…

Астана сыртына шықсаң Қаскелең, Талғар,
Жан-жаққа жосылып жатқан қасқа еден жолдар.
Жол үсті ұршықша үйірілген ұшқыр «Волгалар»,
Жиекте ару қайыңдар, жапырағы жас берен талдар.

Жолдарға жанарын қадап жақындап төнеді көгің,
(Сұлулық тірлік бар жерде сол деймін себебі оның).
Ырғалған автобустар мен ыңыранған ауыр МАЗ-дарға
Көк есек арба сүйреген лажсыз береді жолын.

Тірліктің толқындары аққан бүлкілдеп тамыр жолдармен,
Бірге ағып сапарға шығып, түйін боп бәрін жалғар ма ем!..
Жалғап жүрген шығармын… кезігіп дос болған сайын,
Арманды адал тілеген, тілегі қабыл жандармен.

Астана сыртына шықсаң Қаскелең, Талғар,
Жан-жаққа жосылып жатқан қасқа еден жолдар.
Қарбалас қас-қағым сәтте қосылып қалып,
Жарасып-тарасып жатқан жас-кемел жандар.

Алдыңда сағым қол бұлғап, артыңда ақбас шың сұңғақ,
Жолменен жарысып ағар күркіреп ақ тасқын бұлақ.
Жолдармен жүйткірмін талай, шыңдардан жазыққа қарай,
Атылған ақ тұма жолдар сендерді таппаспын бірақ!

26.05.73 ж.